tariq-e-ishq men barbad hona paḌta hai
gulon ki chaah men kanTon pe sona paḌta hai
bas ek lamha-e-raz-o-niyaz ki ḳhatir
bashar ko muddaton chhup-chhup ke rona paḌta hai
zamir bech ke mansab to mil hi ja.ega
vaqar pahle magar is men khona paḌta hai
hai bad-lihaz ye duniya koi kahan jaa.e
qadam qadam pe yahan ḳhvar hona paḌta hai
ye faqa-kash ki jinhen haif ḳhud-farebi men
shikam ki seri ko paani bilona paḌta hai
ma.ashre ka ho nasur ya badan ka ghaav
ilaaj ke liye nashtar chubhona paḌta hai
pasare haath to phirte ho mal-o-zar ke liye
bil-aḳhir un se magar haath dhona paḌta hai
para.e dard men hota nahin sharik koi
ghamon ke bojh ko ḳhud aap Dhona paḌta hai
ye sach hai ‘chand’ shagufta ghazal jo kahni ho
qalam ko ḳhun-e-jigar men Dubona paḌta hai
Leave a Reply