Tarana-E-Milli

chin-o-arab hamara hindostan hamara

muslim hain ham vatan hai saara jahan hamara

tauhid ki amanat sinon men hai hamare

asan nahin mitana nam-o-nishan hamara

duniya ke but-kadon men pahla vo ghar ḳhuda ka

ham is ke pasban hain vo pasban hamara

teghon ke saae men ham pal kar javan hue hain

ḳhanjar hilal ka hai qaumi nishan hamara

maghrib ki vadiyon men gunji azaan hamari

thamta na tha kisi se sail-e-ravan hamara

batil se dabne vaale ai asman nahin ham

sau baar kar chuka hai tu imtihan hamara

ai gulistan-e-undulus vo din hain yaad tujh ko

tha teri Daliyon men jab ashiyan hamara

ai mauj-e-dajla tu bhi pahchanti hai ham ko

ab tak hai tera dariya afsana-ḳhvan hamara

ai arz-e-pak teri hurmat pe kat mare ham

hai ḳhuun tiri ragon men ab tak ravan hamara

salar-e-karvan hai mir-e-hijaz apna

is naam se hai baaqi aram-e-jan hamara

‘iqbal’ ka tarana bang-e-dara hai goya

hota hai jada-paima phir karvan hamara

Leave a Comment