Jagat Mohan Lal Ravan
taqdir jab muavin-e-tadbir ho ga.i
miTTi pe ki nigah to iksir ho ga.i
dil jaan nisar-e-mai hai zaban ta.ib-e-sharab
is kashmakash men ruuh ki tazir ho ga.i
chhinTen jo ḳhuun ki daman-e-qatil men rah ga.iin
mahshar men mere qalb ki tafsir ho ga.i
ya qatl kijiye mujhe ya baḳhsh dijiye
ab ho ga.i huzur jo taqsir ho ga.i
shabnam oḌhi gulon se mira naqsha khinch gaya
murjha ga.i kali miri tasvir ho ga.i
zindaniyan-e-kakul-e-hasti kidhar ko jaa.en
ik zulf sab ke paanv ki zanjir ho ga.i
main kah chala tha davar-e-mahshar se hal-e-dil
ik surmagin nigah gulu-gir ho ga.i
bas tham gaya safir-e-amal kah ke ya nasib
jis ja pe ḳhatm manzil-e-tadbir ho ga.i
toḌa hai dam abhi abhi bimar-e-hijr ne
aa.e magar huzur ko taḳhir ho ga.i
jab apne aap par hamen qaabu mila ‘ravan’
asan raz-e-dahr ki tafsir ho ga.i
Leave a Reply