Mujhe Is Tarah Na Dekho Mera Dil Machal Na Jae

Sajid Sajni

mujhe is tarah na dekho mira dil machal na jaa.e

ye bala ka manchala hai kisi par phisal na jaa.e

miri bachchi ro rahi hai main abhi sula ke aa.i

zara bhabhi dekhte rahna kahin duudh ubal na jaa.e

karo chheḌ ab na mujh se na jagao so.e fitne

jo charagh bujh chuka hai kahin phir se jal na jaa.e

ye kahan ka chochala hai zara haT ke khelo munna

mira reshmi gharara kahin mal-gujal na jaa.e

tujhe is liye paḌosan main nazar men rakh rahi huun

kahin un se hanste hanste tiri daal gal na jaa.e

ye to manti huun ‘sajni’ ki mili ho baad muddat

mujhe is qadar na bhincho mira dam nikal na jaa.e