Ain Irfan
tanha tanha sahmi sahmi ḳhamoshi
jaisi hain avazen vaisi ḳhamoshi
tanhai men chaunka deti hai aksar
sannaTe se baten karti ḳhamoshi
be-maqsad mahfil se behtar tanhai
be-matlab baton se achchhi ḳhamoshi
do avaze hamrahi ik raste ki
aur donon ke beach men chalti ḳhamoshi
chupke chupke ghar ko dasti rahti hai
darvaze ki divaron ki ḳhamoshi
ḳhamoshi ke zabt se darti avaze
avazon ke shor se darti ḳhamoshi
Leave a Reply