tamam-umr chala huun magar chala na gaya
tiri gali ki taraf koi rasta na gaya
tire ḳhayal ne pahna shafaq ka pairahan
miri nigah se rangon ka silsila na gaya
baḌa ajiib hai afsana-e-mohabbat bhi
zaban se kya ye nigahon se bhi kaha na gaya
ubhar rahe hain fazaon men sub.h ke asar
ye aur baat mire dil ka Dubna na gaya
khule darichon se aaya na ek jhonka bhi
ghuTan baḌhi to havaon se dostana gaya
kisi ke hijr se aage baḌhi na umr miri
vo raat biit ga.i ‘naqsh’ ratjaga na gaya
Leave a Reply