Farrukh Jafari
tamam phenke ga.e pattharon pe bhari tha
vo ek phuul akela sabhon pe bhari tha
na mujh se dil ne bataya na main ne hi jaana
vo kaisa gham tha jo saare ghamon pe bhari tha
main un ki rah se guzarta na tha magar phir bhi
mira vajud mire dushmanon pe bhari tha
agarche baiTha tha main un ke darmiyan ḳhamosh
mira sukut magar sha.iron pe bhari tha
vo jis ka koi na tha duur ik ḳhuda ke siva
zamin ka bojh na ‘farruḳh’ dilon pe bhari tha
Leave a Reply