Jameel Yusuf
ta.alluqat ke zaḳhmon ka huun sataya hua
jo shaam aa.i mira saaya bhi paraya hua
miTega zehan se kab teri yaad ka afsun
hazar sadiyon se ye bojh hai uThaya hua
vo ek shaḳhs abhi dil men chhup ke baiTha hai
vo shaḳhs jo kabhi apna kabhi paraya hua
har ek lamhe ki aahaT pe dil larazta hai
zamane bhar ko ho jaise gale lagaya hua
na.i ruton ki hua ne ajiib sazish ki
ki mauj-e-ḳhun men hai har barg-e-gul nahaya hua
kisi ke saans ki avaz tak nahin aati
sukut-e-marg ne pahra hai vo biThaya hua
har ik nazar men koi ajnabi si aahaT hai
har ek dil men koi ḳhauf hai samaya hua
vo tirgi hai ki ankhon men ik kiran bhi nahin
vo ḳhamushi hai ki lamhon ne zahar khaya hua
main apne vaqt ke zindan ka ek qaidi huun
nazar nazar hai fasilon ne sar uThaya hua
gurez-pa hai vo umr-e-aziz ki manind
hai ek umr se apna jise banaya hua
na koi yaar na hamdam na koi hamrahi
tumhari zulf ka saaya to ḳhair saaya hua
Leave a Reply