Saeed Shahidi
tabi.at su-e-asani kabhi maa.il nahin hoti
mohabbat men koi mushkil bhi ho mushkil nahin hoti
musafir baiTh jaata hai jahan bas baiTh jaata hai
phir us ke ba.ad us ko ḳhvahish-e-manzil nahin hoti
banate hi nasheman barq aati hai jalane ko
ḳhuda ka shukr hai mehnat miri zaa.il nahin hoti
tiri mahfil men kaun aaya tiri mahfil se kaun uTTha
tujhe is ki ḳhabar ai sahab-e-mahfil nahin hoti
unhen rahm aa hi ja.ega tu arz-e-hal karta ja
ḳhulus-e-dil se jo koshish ho la-hasil nahin hoti
agar main ḳhud nahin hota to mera zikr hota hai
ba-juz mere tiri mahfil tiri mahfil nahin hoti
ḳhushi ki hadd-e-aḳhir par to aansu DabDabate hain
magar kya baat hai gham ki koi manzil nahin hoti
Leave a Reply