Tab Zarre Hain Agar Ho to Wahi Dil Ho Jae

Ijtiba Rizvi

taab zarre hain agar ho to vahi dil ho jaa.e

aam jalva hai tira jo mutahammil ho jaa.e

tera har sho.abada ai husn haqiqat Thahre

ham koi naqsh bana len to vo batil ho jaa.e

laakh be-bak nigahon se nigahen laḌ jaa.en

ek sahmi si nazar ho to vo qatil ho jaa.e

Dubna shart-e-safar hai mujhe ai shorish-e-bahr

varna girdab ko duun hukm to sahil ho jaa.e

tujh ko qudrat hai ki har zarre ko ik dil kar de

mujh ko hasrat hai ki jo dil hai mira dil ho jaa.e

apni tasvir-e-majazi koi rakh do ki kahin

karvan-e-nigah-e-shauq ko manzil ho jaa.e

himmat-e-ishq ki hai husn ki fitrat ka ye raaz

sau ko bismil kare aur ek ka bismil ho jaa.e

aaj tak tak na sake dil koi apne qabil

tum ki patthar ko jo taako to vahi dil ho jaa.e

haif apne safar-e-shauq ki qismat ‘rizvi’

paanv thak jaa.en jahan bas vahin manzil ho jaa.e