Ishrat Qadri
tab-e-nigah thi to nazara bhi dost tha
us chashm-e-nargisin ka ishara bhi dost tha
TuuTa to asman se ḳhalaon men kho gaya
jab tak chamak raha tha sitara bhi dost tha
ham khelte the aag se jis sin men un dinon
chingariyan thiin phuul sharara bhi dost tha
aThkheliyan thiin ret pe maujon ki duur tak
Thahri hui nadi ka kinara bhi dost tha
gham-ḳhvariyan thiin sheva dil-e-dard-mand ka
laakh ajnabi ho ishq ka maara bhi dost tha
raten ḳhayal-o-ḳhvab se arasta rahin
pahlu men ek anjuman-ara bhi dost tha
miTTi ka rizq ho gaya kuchh yaden chhoḌ kar
kis se kahen ki shaad sa pyara bhi dost tha
kis tarah ja mila hai saf-e-dushmanan men vo
‘ishrat’ jo ek shaḳhs hamara bhi dost tha
Leave a Reply