ta hashr rahe ye daagh dil ka
ya-rab na bujhe charagh dil ka
ham se bhi tunak-mizaj hai ye
paate hi nahin dimagh dil ka
yaan atish-e-ishq se shab o roz
dahke hai pada ayagh dil ka
us rashk-e-chaman ki yaad men hai
shadab hamesha baagh dil ka
jiine ka maza usi ko hai bas
jis shakhs ko ho faragh dil ka
hai bada-e-gham se tere din raat
labrez yahan ayagh dil ka
maalum nahin kisi ko ‘rangin’
de kaun hamen suragh dil ka