suraj se kuchh kirnen le kar apna kaam chalata hai
jaane phir kya baat hai jis par chand bahut itrata hai
us ke saath guzara maazi ab tak tanha raton men
yadon ki saughaten le kar mujh se milne aata hai
aksar ḳhvab men dikhne vaale ek purane manzar men
ik jaana pahchana chehra duur khaḌa muskata hai
har gosha hai mahka-mahka us ki saundhi ḳhushbu se
lagta hai vo in galiyon men ab tak aata jaata hai
june ki tapti shamon men jab barish ḳhuub barasti hai
bhigi shaḳh pe baiTha panchhi miThe giit sunata hai
hijr ki lambi qaid nibhata ik divana roz-o-shab
divaron se baten kar ke apna ji bahlata hai
soch raha huun apna hai ya phir koi begana hai
vo ik fard ‘zaki’ jo mujh par itna haq jatlata hai
Leave a Reply