Tahir Adeem
ankhon men hai kaisa paani band hai kyuun avaz
apne dil se puchho janan meri chup ka raaz
us ke zaḳhm ko sahna rahna us men hi mahsur
us ke zulm pe hans kar kahna teri umr daraz
teri marzi ḳhushiyon ke ya chheḌ ghamon ke raag
tu meri sur-tal ka malik main huun tera saaz
dil ki har dhaḌkan ka maujib diid shunid tiri
siine men jalti sanson ka tu hi ek javaz
aur si aur hua hai sajan ziist ka har mafhum
aur si aur hui hai meri sochon ki parvaz
tujh bin kaun banega ḳhali ankhen gung sada
tujh bin jaan karega ‘tahir’ kis se raaz niyaz
Leave a Reply