Faiz Khalilabadi
surahi muzmahil hai mai ka piyala thak chuka hai
dar-e-saqi pe har ik aane vaala thak chuka hai
andhero aao aa kar tum hi kuchh aram de do
ki chalte chalte bechara ujala thak chuka hai
adavat ki dararen vaisi ki vaisi hain ab tak
vo bharte bharte ulfat ka masala thak chuka hai
mujhe luuTa zarurat ki yahan har company ne
musalsal karte karte dil kifalat thak chuka hai
suḳhan men kuchh na.e majmua le kar aa.iye aap
purani sha.iri se har risala thak chuka hai
bata ai ‘faiz’ aḳhir gaanv ja kar kya karega
tu jis ke naam ki japta tha maala thak chuka hai
Leave a Reply