Khwaja Ali Husain
suna hai jab se ḳhuda ka kalam rahat hai
har ek dars ka mauzua-e-am rahat hai
kuduraton se kasha.ish mila nahin karti
jahan bhar ko hamara payam rahat hai
main iḳhtiyar ke hote hue kahan ḳhush tha
hua huun jab se kisi ka ghulam rahat hai
main dasht-o-shahar-o-gulistan men be-sukun raha
kiya hai zaat men jab se qayam rahat hai
sata sata ke pareshan ho gaya hai adu
ka.i dinon se hamen sub.h-o-sham rahat hai
ye aa rahi hai miri samt rokna na use
subuk-ravi se jo mahv-e-ḳhiram rahat hai
dukhe dilon se lagavaT se baat kar lena
sukun-e-dil ke liye ehtiram rahat hai
ye qasr-e-lutf banaya hai ‘abdi’ ne magar
mohabbaton men faqat inhidam rahat hai
Leave a Reply