sub.h kaisi hai vahan shaam ki rangat kya hai
ab tire shahr men halat ki surat kya hai
ek azar dhaḌakta hai yahan siine men
ab tujhe kaise bata.en ki mohabbat kya hai
hukm deta hai to avaz laraz jaati hai
jaane ab ke mire salar ki niyyat kya hai
ye jo main peḌ ugane men laga rahta huun
main samajhta huun miri pahli zarurat kya hai
mera to ye hai ki main bikhra hua huun ab tak
tu bata mujh se bichhaḌ kar tiri halat kya hai
aankh men uḌti hui dhuul bata deti hai
dil men aa.e hue bhaunchal ki shiddat kya hai
lamha lamha main khincha jaata huun us ki janib
jaane us miTTi se ‘az.har’ miri nisbat kya hai
Leave a Reply