Vikram Sharma
sochta huun ki dil-e-zar ka matlab kya hai
ek hanste hue bimar ka matlab kya hai
aap kahte hain ki divar gira di jaa.e
aap ki nazron men divar ka matlab kya hai
aḳhiri faisla tum apne mutabiq loge
phir miri haami ya inkar ka matlab kya hai
sang-dil logon se kya apni tabi.at kahte
kisi divar se guftar ka matlab kya hai
uTh ke ja sakte hain ham aison ke saa.e se aap
ham samajhte hain ki ashjar ka matlab kya hai
pahle pahle to faqat zabt ke imkan rahe
rafta rafta khula iz.har ka matlab kya hai
main ki chup zaat tha so sher kaha karta tha
puchh leti thi vo ash.ar ka matlab kya hai
Leave a Reply