Siyah Hai Dil-E-Giti Siyah-Tar Ho Jae

Rais Amrohvi

siyah hai dil-e-giti siyah-tar ho jaa.e

ḳhuda kare ki har ik shaam be-sahar ho jaa.e

kuchh is ravish se chale bad-e-barg-e-rez-e-ḳhizan

ki duur tak saf-e-ashjar be-samar ho jaa.e

baja.e rang rag-e-ghuncha se lahu Tapke

khile jo phuul to har barg-e-gul sharar ho jaa.e

zamana pi to raha hai sharab-e-danish ko

ḳhuda kare ki yahi zahr kargar ho jaa.e

koi qadam na uThe su-e-manzil-e-maqsud

dua karo ki har ik raah pur-ḳhatar ho jaa.e

ye log rah-guzar-e-zist se bhaTak jaa.en

ajal qavafil-e-hasti ki ham-safar ho jaa.e

ba-qadr yak-do-nafs bhi giran hai zahmat-e-zist

hayat-e-nau-e-bashar aur muḳhtasar ho jaa.e