naqab chehre se mere haTa rahi hai ghazal
hisar-e-zat se bahar bula rahi hai ghazal
ye kaun hai jo bahut be-qarar hai mujh men
ye kis ke qurb men yuun kasmasa rahi hai ghazal
vo ḳhol jis men muqayyad huun TuTne ko hai
mujhe bahar ka muzhda suna rahi hai ghazal
vajud ka hua jaata hai falsafa paani
rumuz-e-zat se parde uTha rahi hai ghazal
jo mo’tariz the hue vo bhi mo’tarif us ke
har ek daur men jadu-numa rahi hai ghazal
saha hai ḳhud pe har ik tiir tanz ka hans kar
piya hai zahr magar muskura rahi hai ghazal
hai qadr-dan ko apne ye vaj.h-e-sarshari
ye hasidon ke dilon ko jala rahi hai ghazal
ki sirf gul hi nahin ḳhaar se bhi nisbat hai
ye aur baat ki bad-e-saba rahi hai ghazal
kare hai us pe riyazat ki us ka husn khule
‘obaid’ ke liye misl-e-hina rahi hai ghazal
tha ek shaghl mira meri ye ghazal-goi
‘obaid’ zaat ko ab apni bha rahi hai ghazal
Leave a Reply