Sufi
sirf karb-e-ana diya hai mujhe
zindagi ne bhi kya diya hai mujhe
muskurate hue bhi darta huun
gham ne buzdil bana diya hai mujhe
jis tarah ret par ho naqsh koi
yuun hava ne mita diya hai mujhe
main use dil-lagi samajhta tha
tu ne sach-much bhula diya hai mujhe
yarab is be-hison ke shahr men kyuun
dil-e-dard-ashna diya hai mujhe
vo bhi thandi hava ka jhonka tha
jis ne yaksar jala diya hai mujhe
us ne rakkha hai be-tarah masruf
roz hi gham naya diya hai mujhe
aaj mere hi dil ne ai ‘abid’
apna dushman bana diya hai mujhe
Leave a Reply