siine ki ḳhanqah men aane nahin diya
ham ne use charag jalane nahin diya
duzdan-e-nim-shab ne bhi hiile bahut kiye
lekin kisi ko ḳhvab churane nahin diya
ab ke shikast-o-reḳht ka kuchh aur hai sabab
ab ke ye zaḳhm teri jafa ne nahin diya
is baar to saval bhi mushkil na tha magar
is baar bhi javab qaza ne nahin diya
kya shaḳhs tha uḌata raha umr bhar mujhe
lekin hava se haath milane nahin diya
mumkin hai vaj.h-e-tark-e-ta.alluq usi men ho
vo ḳhat jo mujh ko bad-e-saba ne nahin diya
is hairati nazar ki simaTti giraft ne
uThta hua qadam bhi uThane nahin diya
sham-e-vida.a thi magar us rang-baz ne
paanv pe honT rakh diye jaane nahin diya
kuchh to ‘hasan’ vo dad-o-sitad ke khare na the
kuchh ham ne bhi ye qarz chukane nahin diya
Leave a Reply