sim-o-zar ki koi tanvir nahin chahti main
kisi shahzadi si taqdir nahin chahti main
maktab-e-ishq se vabasta huun kaafi hai mujhe
dad-e-‘ghalib’ sanad-e-‘mir’ nahin chahti main
faizyabi tiri sohbat hi se milti hai mujhe
kab tire ishq ki tasir nahin chahti main
qaid ab vasl ke zindan men tu kar le mujh ko
ye tire hijr ki zanjir nahin chahti main
mujh ko itni bhi na sikhla tu nishana baazi
tujh pe chal jaae mira tiir nahin chahti main
ab to aata nahin ‘amabar’ vo kabhi sapne men
ab kisi khvab ki taabir nahin chahti main
Leave a Reply