shu.ur-o-fikr se aage nikal bhi sakta hai
mira junun havaon pe chal bhi sakta hai
mire guman pe uThao na ungliyan sahab
guman yaqin men yaqinan badal bhi sakta hai
pahaḌ apni qadamat pe yuun na itra.en
ubhar gaya koi zarra nigal bhi sakta hai
mire labon pe jami barf soch kar chhuna
tumhare jism ka aahan pighal bhi sakta hai
koi asa bhi nahin aur hai akela tu
amir-e-shahr ka azhdar nigal bhi sakta hai
hamare saath jo chalna hai zad-e-rah le lo
kaThin se moḌ hain paanv phisal bhi sakta hai
karo na zid ki kisi shahr ki taraf ja.un
mire aziiz ye dil hai machal bhi sakta hai
kar apne saa.e se raz-o-niyaz ki baten
bahut udaas hai lekin bahal bhi sakta hai
bas ik nazar jo karam ki vo us taraf phere
qadam bahak jo gaya hai sambhal bhi sakta hai
Leave a Reply