shikva-e-jaur-o-jafa ho ye zaruri to nahin
hashr ulfat ka bura ho ye zaruri to nahin
arz-e-matlab bhi ḳhata ho ye zaruri to nahin
is men tauhin-e-vafa ho ye zaruri to nahin
haq mohabbat ka ada ho ye zaruri to nahin
dard-e-dil ki bhi dava ho ye zaruri to nahin
jaur altaf-numa ho ye zaruri to nahin
gham ki talḳhi men maza ho ye zaruri to nahin
ibtida shauq ki hoti hai pur-ummid aksar
us ka anjam bura ho ye zaruri to nahin
is qadar bhi koi baton men na aa.e ai dil
un ki har baat baja ho ye zaruri to nahin
ham ne qurban kiye ishq men jan-o-dil bhi
hurmat-e-ahl-e-vafa ho ye zaruri to nahin
maar Daala tiri ik tarz-e-taghaful ne mujhe
aur tajdid-e-jafa ho ye zaruri to nahin
main gunahgar-e-mohabbat huun ye taslim magar
har sitam mujh pe rava ho ye zaruri to nahin
dekhiye jaur-e-musalsal pe mire zabt ki taab
lab pe shikva ho gila ho ye zaruri to nahin
jin se ai dil tira kuchh ḳhaas ta.alluq Thahra
un se iz.har-e-vafa ho ye zaruri to nahin
tarjuman-e-dil-e-betab to nazren bhi hain
kuchh zaban se bhi ada ho ye zaruri to nahin
dil-e-betab ko taskin to mil jaati hai
meri har aah rasa ho ye zaruri to nahin
mujh ko rahbar ki qayadat to hai manzur magar
us ko manzil ka pata ho ye zaruri to nahin
ai ‘kanval’ tu ne kabhi koi taraddud bhi kiya
ik muqaddar hi bura ho ye zaruri to nahin
Leave a Reply