shayad miri fariyad suna.i nahin deti
qudarat jo mujhe hukm-e-riha.i nahin deti
tha pahle bahut shor nihan-ḳhana-e-dil men
ab to koi siski bhi suna.i nahin deti
ḳhvabon ki tijarat men yahi ek kami hai
chalti hai dukan ḳhuub kama.i nahin deti
har tar-e-nafas hai mut.harrik mutvatir
ruḳhsat hi mujhe naghma-sara.i nahin deti
kya dhund hai ashkon ki musallat dil o jaan par
dekhi hui duniya bhi dikha.i nahin deti
chalne ko to sab yaar kamar-basta khaḌe hain
jis raah pe chalna hai sujha.i nahin deti
kanTon pe chalati hai koi aur hi lazzat
vahshat ka sila abla-pa.i nahin deti
main qaid-e-mahalat se dam bhar men nikal ja.un
hasil ki havas mujh ko riha.i nahin deti
main apni hi miTTi se bana leta huun ‘mid.hat’
vo chiiz jo auron ki ḳhuda.i nahin deti
Leave a Reply