Abdul Ahad Saaz
tab-e-hassas miri khaar hui jaati hai
be-hisi ishrat-e-kirdar hui jaati hai
ye khamoshi ye ghulavat ye bichhadte hue rang
shaam ik dard bhara pyaar hui jaati hai
aur barik kiye jaata huun main mu-e-qalam
tez-tar sozan-e-iz.har hui jaati hai
kuchh to sach bol ki dil se ye giran bojh hate
zindagi jhuut ka tumar hui jaati hai
jada-e-fan se guzarna bhi kashakash hai tamam
raah khud raah ki divar hui jaati hai
soch ki dhuup men jal uthne ko ji chahta hai
apne lafzon se bhi ab aar hui jaati hai
ziist yuun shaam ke lamhon se guzarti hai kabhi
khud-ba-khud sharh-e-gham-e-yar hui jaati hai
kam se kam phunk hi de bujhti hui raakh men ‘saz’
akhiri saans bhi be-kar hui jaati hai
Leave a Reply