Shauq Tha Shabab Ka Husn Par Nazar Gai

Nushur Wahidi

shauq tha shabab ka husn par nazar ga.i

luT ke tab ḳhabar hui zindagi kidhar ga.i

zindagi qarib hai kis qadar jamal se

jab koi sanvar gaya zindagi sanvar ga.i

hai chaman ki aabru qafila bahar ka

bu-e-gul ka saath kya be-vafa jidhar ga.i

dekhte hi dekhte din ga.e bahar ke

fasl-e-gul bhi kis qadar tez-tar guzar ga.i

kyuun sakun nasib hain hijr ki daraziyan

jaise pyaas bujh ga.i jaise bhuuk mar ga.i

kya ḳhabar ‘nushur’ thi manzil hayat ki

phuul le liya magar nok-e-ḳhar utar ga.i