Poet
shauq ki kam-nigahi bhi hai gavara mujh ko
gham to gham aaj ḳhushi bhi hai gavara mujh ko
justuju saath hai sham-e-rah-e-manzil ban kar
apni be-rah-ravi bhi hai gavara mujh ko
lazzat-e-zist ba-har-taur sabhi ko hai aziiz
zahr-e-mina-e-ḳhudi bhi hai gavara mujh ko
sozan-e-rahm-o-karam karti hai kyuun sa.i-e-rafu
chak-daman-e-tahi bhi hai gavara mujh ko
aap lillah na farma.en ziyada zahmat
ab tavajjoh ki kami bhi hai gavara mujh ko
sirf tar-damani-e-dil hi pe israr nahin
chashm-e-pur-nam ki kami bhi hai gavara mujh ko
jur.at-e-arz-e-tamanna se huun bad-zan ‘yaqub’
zabt ki kam-suḳhani bhi hai gavara mujh ko
Leave a Reply