shauq ke shahr-e-tamanna ke Thikane guzre
raat phir zehn se kuchh ḳhvab purane guzre
chand jab jhiil men utra to manazir ki tarah
mujh ko chhukar tire baazu tire shane guzre
jaane kis shaḳhs ke baare men pareshan ho tum
ab hamen ḳhud ko bhulate bhi zamane guzre
ham to har moḌ bichha aa.e the daman apna
jaane kis raah baharon ke ḳhazane guzre
bujhne lagta hai kisi sham.a ke manind vajud
jab tiri yaad havaon ke bahane guzre
manzar-e-shauq vahi hai to safar kaisa tha
ham guzar aa.e ki ‘jamshed’ zamane guzre
Leave a Reply