sharik-e-alam-e-kaif-o-surur main bhi tha
ki raat jashn men tere huzur main bhi tha
ajiib vaqt tha duniya qarib thi mere
ghazab ye tha tire daman se duur main bhi tha
ghamon ke ghere men jab raqs kar rahi thi hayat
tamash-bin ki tarah be-shuur main bhi tha
na rukna raah men shart-e-safar men shamil tha
thakan se varna bahut chuur chuur main bhi tha
utar raha tha lahu kis bala ka ankhon men
tire khayal men us dam zarur main bhi tha
guzarte vaqt ne pahre baitha diye ‘abid’
khataen un ki na thiin be-qusur main bhi tha
Leave a Reply