Sharab KHun-E-Jigar Hai Hum Ko Sharab Hum Le Ke Kya Karenge

sharab ḳhun-e-jigar hai ham ko sharab ham le ke kya karenge

gazak ki ja hai dil-e-birishta kabab ham le ke kya karenge

hazar parde men tum chhupao pa husn chhupta nahin miri jaan

tumhare aariz ye kah rahe hain naqab ham le ke kya karenge

hamare naqd-e-dil-o-jigar ko hisab ke ba.ad pher denge

hisab lene ka un se hasil hisab ham le ke kya karenge

hamen jo bheja hai tum ne mus.haf to yaar harf-ashna nahin ham

dikhao apna ruḳh-e-kitabi kitab ham le ke kya karenge

buton ki ulfat se ba.az aa.en magar jo dil maan jaa.e vaa.iz

azaab men jaan paḌ ga.i hai savab ham le ke kya karenge

jo man.a karta hai dil na denge buton ko naseh magar ḳhudara

bata de tu hi ki is tarah ka azaab ham le ke kya karenge

ḳhuda ki baḳhshi hui hai vaq.at ‘asar’ nahin koi aisi ne.amat

mili hai jab izzat-e-siyadat ḳhitab ham le ke kya karenge