sham.a nazan hai faqat sar se bhaḌak jaane men aag
phunk de saara jahan haigi vo parvane men aag
sho.ala-e-sham-e-haram husn-e-butan se hai ḳhajil
mujh ko ḳhatra hai ki lag jaa.e na but-ḳhane men aag
dekhna garmi ki ḳhubi meri baari jab aa.e
ja-e-mai saaqi ne bhar di mire paimane men aag
shaiḳh ki sumran-shumari men koi garmi nahin
chashm-e-bina ho to zahir hai har ik daane men aag
atishin naale vo majnun ke mujhe aate hain yaad
dekhta huun jo kahin dahke hai virane men aag
be-dimaghi hai baja us ke fasane se miri
ḳhvab kya laave vo pinhan ho jis afsane men aag
kab hinsa tha main bhala jalne pe parvane ke ‘lutf’
daf.atan phunki miri ja.egi jo kashane men aag
Leave a Reply