shaam ke vaqt charaghon si jalai hui main
ghup andheron ki munderon pe sajai hui main
dekhne valon ki nazron ko lagun saada varaq
teri tahrir men huun aise chhupai hui main
khaak kar ke mujhe sahra men udane vaale
dekh raqsan huun sar-e-dasht udaai hui main
kya andheron ki hifazat ke liye rakkhi huun
apni dahliz pe khud aap jalai hui main
log afsana samajh kar mujhe sunte hi rahe
dar-haqiqat huun haqiqat se banai hui main
meri ankhon men samaya hua koi chehra
aur us chehre ki ankhon men samai hui main
kitni hairan hai duniya ki muqaddar ki nahin
apni tadbir ke hathon huun banai hui main
mere andaz pe ta-der ‘alina’ vo hansa
zikr men us ke thi yuun khud ko bhulai hui main
Leave a Reply