shaam ke Dhalte suraj ne ye baat mujhe samjha.i hai
tariki men dekh sakun to ankhon men bina.i hai
ehsasat ki tah tak jaana kitna mushkil hota hai
zehn-o-dil men jitna utro utni hi gahra.i hai
rishte-nate bahar se to jism ko ghere baiThe hain
ruuh ke andar jhank ke dekho milon tak tanha.i hai
lafzon ne hi nashtar ban ke dil ko gahre zaḳhm diye
lafzon ne hi zaḳhm-e-dil ko ThanDak bhi pahuncha.i hai
piiTh pe karta vaar to shayad men sadme se mar jaata
main to ḳhush huun main ne us se choT jigar pe khaa.i hai
kamron ke baTvare men ik kamra zaa.id jaane do
lekin ye ehsas bacha lo apna hi to bhaa.i hai
diip jala kar duniya vaale is tiili ko bhuul ga.e
lekin sach hai dipak raushan karti diya-sala.i hai
majzubon ke khel samajhna sab ke bas ki baat nahin
pahle zaḳhm udheḌ ke jaana phir us ki turpai hai
raten apni raushan kar lo ashkon se ‘shayan’ abhi
vaqt se pahle apne safar ki tayyari dana.i hai
Leave a Reply