sham-e-gham se shab-e-andoh se chashm-e-tar se
baaz aaya main tiri yaad ke us lashkar se
yaan shab-o-roz hai matlab kise ḳhair-o-shar se
zindagi ka hai ajab silsila sim-o-zar se
jo tujhe chaha batana na bataya phir bhi
kab chhupa hal-e-dil-e-soḳhta nama-bar se
ba.ad-e-takmil hui ghar ki haqiqat ma.alum
ghar kahan banta hai divar se chhat se dar se
mehrbanon men tira naam to likkha hai magar
ḳhuub vaqif huun miri jaan tire tevar se
sar bachata huun to phir paanv nikal jaate hain
aib iflas ka chhupta hi nahin chadar se
hirs ki dauḌ se rahta huun alag ai ‘anjum’
faiz pahuncha hai mujhe dars-e-gah-e’qaisar’ se
Leave a Reply