Niyaz Husain Lakhwera
shajar aram-dah hone lage hain
parinde rat-din sone lage hain
ye kaisa saneha ab ke hua hai
sabhi chhoTe baḌe rone lage hain
mohabbat banjh dharti ban ga.i hai
badan ab be-samar hone lage hain
is ahd-e-narava ke ahl-e-danish
kabhi Thigne kabhi baune lage hain
sada.en be-sada alfaz banjar
qalam viran se hone lage hain
bahi-ḳhvahon ko ḳhush rakhne ki ḳhatir
ham apne aap pe rone lage hain
Leave a Reply