Poet
shahr gum-sum raste sunsan ghar ḳhamosh hain
kya bala utri hai kyuun divar-o-dar ḳhamosh hain
vo khulen to ham se raz-e-dasht-e-vahshat kuchh khule
lauT kar kuchh log aa.e hain magar ḳhamosh hain
ho gaya gharqab suraj aur phir ab us ke ba.ad
sahilon par ret uḌti hai bhanvar ḳhamosh hain
manzilon ke ḳhvab de kar ham yahan laa.e ga.e
ab yahan tak aa ga.e to rahbar ḳhamosh hain
dukh safar ka hai ki apnon se bichhaḌ jaane ka gham
kya sabab hai vaqt-e-ruḳhsat ham-safar ḳhamosh hain
kal shajar ki guftugu sunte the aur hairat men the
ab parinde bolte hain aur shajar ḳhamosh hain
jab se ‘az.har’ ḳhal-o-ḳhad ki baat logon men chali
aa.ine chup-chap hain a.ina-gar ḳhamosh hain
Leave a Reply