poet

Khayal Guzre Kahan Kahan Ka Irada Un Ko Ho Gar Yahin Ka

khayal guzre kahan kahan ka irada un ko ho gar yahin ka

na kuchh thikana mire guman ka na kuchh thikana mire yaqin ka

na shauq mujh ko hai hur-e-in ka na pas-e-vaiz hai apne diin ka

jo zikr karna hai gar yahin ka suna na jhagda kahin kahin ka

kharab ku-e-butan hai khilqat yahin se paate hain ranj-o-rahat

siphar-e-gardish men kar na jurat ki daur aaya hai ab zamin ka

shahid hone ki ye tamanna na dil se niklegi dekh lena

uthae khanjar vo haath men kya na yaar sambhle jab astin ka

hazar naale zaban pe laata hazar mahshar abhi dikhata

shab-e-judai agar na aata khayal us chashm-e-surmagin ka

nishan-e-pa-e-adu ne maara ki tere dar par nahin gavara

jhuke jo sajde ko sar hamara mitaen likkha hua jabin ka

kahun matalib sab apne ji ke ye shart kiije ki haan na kiije

kaho nahin phir usi tarah se mujhe hai sunna nahin nahin ka

jo puchhe mujh sa hai koi bad-zan kaho na ahval-e-vasl-e-dushman

ye main ne maana ki tum ho pur-fan ilaaj kya chashm-e-sharmgin ka

milegi mahshar men daad ab kya ada-e-matlab men huun main uljha

bayan pahle hi kyuun kiya tha tumhare gesu-e-ambarin ka

bayan-e-lutf-e-adu jafa hai ye tum se sau-bar kah diya hai

phir ab ki sun lo nahin raha hai hamen bhi zabt ah-e-atshin ka

ajab hai ‘salik’ bhi rind-mashrab ki chhod baitha hai millaten sab

na manta hai kisi ka mazhab na hai ye paband apne diin ka

More Poems

Leave a Comment