shahr-e-hava men jalte rahna andeshon ki chaukhat par
raat gae tak uljhe rahna be-mafhum khayalon men
qasr-e-umr gavahi dega kaise kaise karb sahe
kaisi kaisi rut guzri hai ham par itne salon men
dosh-e-khala se khak-e-zamin par utre to ehsas hua
taare bantne vaale raahi pad gae kin janjalon men
le aai kis qarya-e-shab men ik jhute mahtab ki chaah
saaya saaya bhatak raha huun be-tanvir ujalon men
mausam mausam yahi raha gar khushbu ki tahqir ka rang
siise ki kaliyan phutengi ab lohe ki dalon men
‘sajid’ ab tak bhugat rahe hain ik be-ant saza ki umr
apna naam likha baithe the ik din jiine valon men
Leave a Reply