shahr badla hua sa lagta hai
har koi uupra sa lagta hai
mujh ko aksar ḳhud apne andar hi
kuchh bhaTakta hua sa lagta hai
jaane kya baat hai ki ghar mujh ko
roz girta hua sa lagta hai
mujh ko har shaḳhs apni basti ka
ḳhud se ruTha hua sa lagta hai
dard se yuun najat kab hogi
vaqt Thahra hua sa lagta hai
zaḳhm khaa.e hue zamana hua
dard ab tak naya sa lagta hai
dastanen hain ḳhuub sab ki magar
apna qissa juda sa lagta hai
Leave a Reply