tujhe e’tibar-e-sahar bhi hai
tujhe intizar-e-bahar bhi
magar ai sada-e-umid-e-dil
miri zindagi to qalil hai
ye shab-e-ḳhizan
hai mire guman se ajib-tar
koi as-pas nahin yahan
koi shakl ho jo dil-afrin
koi naam ho jo mata-e-jan
koi chand zina-e-abr se
utar aae aur mujhe thaam le
koi ḳhvab-ru badi gahri niind se
chaunk kar mira naam le
sar-e-sham koi sitara jo
koi rah-rau kisi raah men
jise ho faqat yahi aarzu
mira haath thaam ke raushni ke
kisi madar men le chale
miri niind chuum ke
ḳhvab ke kisi margh-zar men le chale
magar ai baha-e-umid-e-dil
tiri zindagi bhi qalil hai
ye ḳhizan ki raat
tavil hai