shab-e-hijran ki vahshat ko tu ai bedad kya jaane
jo din padte hain raton ko mujhe teri bala jaane
juda ham se hua tha ek din jo apne yaron men
khabar phir kuchh na paai kya hua vaaqe khuda jaane
na rakh ai abr tu sar par hamare baar minnat ka
vo badal aur hain jo aag ko dil ki bujha jaane
na rakh ai dil tu ummid-e-vafa in be-vafaon se
khuda se hai vo begana jo but ko ashna jaane
junun ne us ke gul se bulbulon tak shor daala hai
‘yaqin’ sa ho koi tab is tarah dhumen macha jaane
Leave a Reply