sayon se lipaT rahe the saa.e
dil phir bhi faza men jagmaga.e
be-sarfa bhaTak rahi thiin rahen
ham nur-e-sahar ko DhunD laa.e
ye gardish-e-rozgar kya hai
ham sham-o-sahar ko dekh aa.e
har sub.h tiri nazar ka partav
har shaam tiri bhavon ke saa.e
hai fasl-e-bahar ka ye dastur
jo aa.e chaman men muskura.e
kya chiiz hai ye fasana-e-dil
jab kahne lagen to bhuul jaa.e
tum hi na samajh sake miri baat
ab kis ki samajh men baat aa.e
suuni rahi intizar ki raat
ashkon ne bahut diye jala.e
vo din jo bahar-e-zindagi the
vo din kabhi lauT kar na aa.e
Leave a Reply