saaya koi main apne hi paikar se nikalun
tanha.i bata kaise tujhe ghar se nikalun
ik mauj bhi mil jaa.e agar mujh ko sile men
girte hue dariya ko samundar se nikalun
teshe se bajata phirun main barbat-e-kohsar
naghme jo mire dil men hain patthar se nikalun
lau tez nahin kuchh miri ankhon hi ki shayad
matlab yahi be-nuri-e-manzar se nikalun
badle na koi rang tira husn-e-ḳhamoshi
main baat ke pahlu tire tevar se nikalun
tauba ne jagaya mire andar ka sharabi
ab faal bhi TuuTe hue saghar se nikalun
sochon ke bayaban men liye phirta hai mujh ko
kya zehn bhi sauda hai jise sar se nikalun
ik nasl-e-suḳhan mujh men hai abad ‘muzaffar’
surat na.i har lafz ke andar se nikalun
Leave a Reply