saval-andar-saval le kar kahan chale ho
ye asman-e-malal le kar kahan chale ho
junun ke raste men ye khudi bhi azaab hogi
khirad ka koh-e-vabal le kar kahan chale ho
kahan pe khologe dard apna kise kahoge
kahin chhupao, ye haal le kar kahan chale ho
naha rahe ho azab-e-hijran ki barishon men
zara si gard-e-visal le kar kahan chale ho
sarab piine ki aarzu hai to javab de do
safar men khvab-o-khayal le kar kahan chale ho
chale ho jab to hamare mausam badal chuke hain
suno ye mere vabal le kar kahan chale ho
Leave a Reply