Javed Akhtar
saari hairat hai miri saari ada us ki hai
be-gunahi hai miri aur saza us ki hai
mere alfaz men jo rang hai vo us ka hai
mere ehsas men jo hai vo faza us ki hai
sher mere hain magar in men mohabbat us ki
phuul mere hain magar bad-e-saba us ki hai
ik mohabbat ki ye tasvir hai do rangon men
shauq sab mera hai aur saari haya us ki hai
ham ne kya us se mohabbat ki ijazat li thi
dil-shikan hi sahi par baat baja us ki hai
ek mere hi siva sab ko pukare hai koi
main ne pahle hi kaha tha ye sada us ki hai
ḳhuun se sinchi hai main ne jo zamin mar mar ke
vo zamin ek sitam-gar ne kaha us ki hai
us ne hi is ko ujaḌa hai ise luuTa hai
ye zamin us ki agar hai bhi to kya us ki hai
Leave a Reply