sarhad-e-jism se bahar kahin ghar likkha tha
ruuh par apni ḳhalaon ka safar likkha tha
ham bhaTakte rahe sadiyon jise paḌhne ke liye
apne andar vo kahin harf-e-hunar likkha tha
aaj un ankhon men dekha to mila dasht-e-ḳhala
ham ne jin ankhon men ik ḳhvab-nagar likkha tha
apne ghar men isi ehsas ne jiine na diya
apne hathon pe kisi aur ka ghar likkha tha
zindagi ek sulagta hua sahra tha jahan
sab ki ankhon men sarabon ka bhanvar likkha tha
kaun tha mujh men ki jis ne mujhe paḌhne na diya
mere chehre pe mira naam agar likkha tha
apni hi zaat ke haale men rahe ham ‘azad’
an-ginat da.eron ka ya.ani safar likkha tha
Leave a Reply