Salam Machhli Shahri
sarhad-e-fana tak bhi tirgi nahin aa.i
yuun bhi raas andheron ki zindagi nahin aa.i
tum sharab pi kar bhi hosh-mand rahte ho
jaane kyuun mujhe aisi mai-kashi nahin aa.i
jis ki bhi tabahi ho kuchh asar to rakhti hai
aaj meri halat par kyuun hansi nahin aa.i
aur bhi daraḳhshan ho ai mire na.e suraj
ab bhi mere angan men raushni nahin aa.i
rahravan-e-danish ki zindagi batati hai
kaam kin manazil men agahi nahin aa.i
log chaar hi din men ban ga.e ‘salam’ ai dil
aur ḳhud mujhe ab tak sha.eri nahin aa.i
Leave a Reply