Anand Narayan Mulla
sar-e-mahshar yahi puchhunga ḳhuda se pahle
tu ne roka bhi tha bande ko ḳhata se pahle
ashk ankhon men hain honTon pe buka se pahle
qafila gham ka chala bang-e-dara se pahle
haan yahi dil jo kisi ka hai ab a.ina-e-husn
varaq-e-sada tha ulfat ki jila se pahle
ibtida hi se na de ziist mujhe dars is ka
aur bhi baab to hain bab-e-raza se pahle
main gira ḳhaak pe lekin kabhi tum ne socha
mujh pe kya biit ga.i laghzish-e-pa se pahle
ashk aate to the lekin ye chamak aur taḌap
in men kab thi gham-e-ulfat ki jila se pahle
dar-e-mai-ḳhana se aati hai sada-e-saqi
aaj sairab kiye ja.enge pyase pahle
raz-e-mai-noshi-e-‘mulla’ hua ifsha varna
samjha jaata tha vali laghzish-e-pa se pahle
Leave a Reply